LEGAZPI CITY – Inanunsyar kan gobyerno probinsyal kan Albay an mga dugang na benipisyo na mareresibe kan mga barangay day care workers.
An nasambitan na lakdang an nagmamawot na masierto na maitatao sa mga kaakian an kalidad kan edukasyon na kinakaipuhan kan mga ini.
Sa sarong intrevista, ipighayag ni Provincial Board Member Howard Imperial na kaibanan sa mga benipisyong ini an Philhealth insurance, medical examination sa mga pasilidad kan gobyerno, librening asistensyang ligal, pinansyal, asin pagamit kan mga government facilities para sa mga conventions kan BDCW.
Segun sa opisyal, inaprubaran na an mga serbisyong ini sa ika-tulong pagbasa kan Sangguniang Panlalawigan kan Albay.
Naglalaom man an opisyal na saro ini sa mga magigin motibasyon kan mga day care workers ngani na mas mapakarahay pa an saindang performance.
Dugang pa ni Imperial na nangangaipo nin budget hale sa pondo kan provincial government an mga dugang na insentibo para sa mga BDCW na iba-validate kan Provincial Social Welfare and Development Office (PSWDO.)
