LEGAZPI CITY—Nanotaran kan mga turista an pitong darakulang butanding sa baybayon kan Donsol, Sorsogon.
Magigiromdoman na pigkonsederar na Whale Shark Capital of the Philippines an banwaan kan Donsol kun kaya dakol na mga bisita an nagpapasiring digdi.
Segun ki LGU Donsol Tourism Operations Officer Don LLagas, sa intrevista kan Bombo Radyo Legazpi, na an nasambitang pangyayari ikinaogma kan mga nagbirisita sa saindang baybayon.
Huli man kaya kan magayon na kamugtakan na panahon sa nasambit na lugar, mahihiling na ciento porciento an presensya kan planktons siring man an mga butanding.
Dugang man kaini na kalimitan na sa bulan kan Disyembre nahihiling na an mga siring na hayop alagad huli kan shearline o mga pag-uuran sa komunidad, ini nakaapekto man sa produksyon kan planktons na saro sa pangenot na pigkakaon kan mga ini na kun saen nakadepende digdi an presensya kan mga butanding.
Sinabi man kan opisyal na nagtatarabangan an mga residentes digdi nganing mamantenir an kalinigan sa lugar asin bilang pagtaong respeto sa tourism icon nindang butanding magin na man sa gabos na marine wildlife sa nasambitang banwaan.
