LEGAZPI CITY-Nagsakat na sa 61 an numero kan mga nagadan sa 7.8-magnitude na linog na nagtama sa Mindanao kan Hunyo 8, segun sa Office of Civil Defense (OCD).
Padagos pang pigbeberipika an pagkakakilanlan kan mga biktima.
Basado sa mga report, 33 pa an nawawara mantang 1,221 an irido, kabale an kadakol na mga estudyante na nagsapo nin trauma asin nagpabulong ngonian sa mga ospital.
Susog sa ahensya, kadaklan sa mga nagadan iyo an mga biktima nin landslide asin narumpag na mga edificio asin debris, partikular na sa General Santos City, Jose Abad Santos (Davao Occidental), asin Sarangani Island.
Padagos man an search and rescue operations sa mga lugar na dipisil pa maabot huli sa landslide.
Kasabay kaini, padagos an paghatod nin pagkakan, malinig na inumong tubig, tolda, asin iba pang relief supplies gamit an mga eroplano, barko, asin helicopter kan gobierno.
Mientrastanto, mantenidong sarado an General Santos City Airport sa mga commercial flights, alagad bukas ini para sa humanitarian missions.
Naka-record man an PHIVOLCS nin haros 4,000 na aftershocks poon kan mangyari an makusog na linog sa Mindanao.
