LEGAZPI CITY- Nagpaluwas nin show cause order asin preventive suspension an Land Transportation Franchising and Regulatory Board Bicol sa sampulong iba pa na mga UV Express na nasa irarom kan prangkisa kan pampasaherong van na naimbwelto sa madugong aksidete sa Libod, Camalig, Albay.
Segun ki Land Transportation Franchising and Regulatory Board Bicol Director Joel Defeo sa intrevista kan Bombo Radyo Legazpi na an nasabing aksyon an parte sana kan standard operating procedure huli ta naimbwelto sa aksidente an saro sa saindang mga unit.
Nilinaw kan opisyal na dae ini nangangahuluhan na an driver na kan nasabing UV Express an may kasalan sa nasabing insidente, urog pang nagpapadagos pa an imbestigasyon.
Marurumduman na ikinagadan nin nasa 11 indibidwal an pagbangga kan sarong truck sa pampasaherong UV Express.
Segun ki Defeo na pigsasapinal na man an pagkuwa kan pangaran kan mga biktima sa aksidente ngani na maisumiter na ini sa passenger insurance company.
Paliwanag kan opisyal na entitled an mga pasahero na binawian nin buhay sa asistensya na hasta sa P400,000 sa irarom kan passenger personal accident insurance program.
Mandatory ini na insurance sa gabos na mga pasahero kan mga public utility vehicles.
Mientras tanto, an saro man na survivor an pwedesir man na makakuwa nin medical reimbursement sa gabos na mga ginastos kaini sa pagpapabulong.
