LEGAZPI CITY – Nasulo an mga waste material asin mga basura na pigtatambak kan sarong sarong pribadong kompanya sa saindang lote sa Barangay Lidong, Sto. Domingo, Albay.
Segun ki Bureau of Fire Protection Sto. Domingo Fire Marshal Senior Fire Officer 3 Madonna Rempillo sa intrevista kan Bombo Radyo Legazpi na pigkonsidera ninda ining rubbish fire asin bako forest fire.
Basado man sa saindang inisyal na imbestigasyon, accidental an nasa likod kan kasulo alagad dae man pighahale an posibilidad na may nagsindi asin nagpakalayo kan mga ini.
Maswerte suboot na warang kataraid na mga kaharongan an nasabing lote kun kaya wara man na nadamay o nadanyaran sa insidente.
Pigtaram pa kan opisyal na ini na an ikaduwang insidente nin kasulo na narespondehan kan saindang departamento ngonian na taon asin naglalaom siya na dae na ini madugangan pa.
Mientrastanto, padagos man an saindang information campaign asin survey sa mga kaharongan nganing magkaigwa sinda nin kaaraman kun ano an dapat gibuhon enkaso magkaigwa nin insidente nin kasulo.
Pagirumdom ni Rempillo sa publiko na permihang mag-ingat huli ta maski anong oras an pwedesir mangyari an kasulo urog na ngonian na haralangkaw an init na naeeksperyensya sa saindang banwaan.
