LEGAZPI CITY- Dae pwedesir na makasalbar sa ley an siisay man na madadakop kan mga pulis na nagsasagibo nin iligal na sugal.
Ini huli ta sigon sa tagapagtaram kan Albay PNP na si PCI Arthur Gomez, antes an pinahigot na kampanya kan gobyerno kontra sa illegal gambling, nagpalibot sinda nin mga information materials sa mga municipal police stations ngani na iheras sa mga residentes.
Dakula man suboot an obligasyon kan mga opisyales kan barangay sa pagtukdo nin mga impormasyon sa saindang mga constituentes apwera pa sa pagtabang na mapundo an mga iligal na aktibidad na katakod kan nasambitan na kampanya.
Klinaro man ni Gomez na pigtatawanan nin konsiderasyon an mga sugal sa lamay sa kondisyon na dapat dae nin magreklamong residente dapit sa ribok o istorbo na kawsa kaini.
Maogma man na ipigheras kan opisyal na 90% sa saindang mga nadadakop, iyo an huli sa timbre kan mga concerned citizens.
Indikasyon suboot ini na nakikipagkooperar an publiko sa kamawotan kan gobyerno na mapuho an mga iligal na wigo.
Mientrastanto, liwat na tinawan duon ni Gomez na maikokonsidirar na sugal an gabos na igwa nin imbweltong kwarta asin dae nin permit gikan sa mga otorisadong ahensya de gobyerno.
