LEGAZPI CITY- Preparadong magtabang an idinesignar na mga traffic enforcers sa provincia kan Albay sa Land Transportation Office (LTO) katakod kan pagresolber sa nagkapirang problema sa trapiko siring man sa mga aksidente sa tinampo.
Segun ki Albay Public Safety and Emergency Management Office (APSEMO) chief Dr. Cedric Daep, igwa na sinda ngonian na 68 enforcers na kadaklan an hale sa pulisya mantang piglalaomang madudugangan pa an nasabing numero.
Aminado man an opisyal na kulang an personahes kan LTO kun kaya nakaalalay an provincial government.
Maogma man na ipigheras ni Daep na magagamit na kan mga enforcers an binakal na tow vehicle kan provincia para sa mga illegal parking sa maabot na Agosto siring man an limang motorsiklo para sa monitoring.
Napag-araman pa na nagbakal naman nin lote sa Brgy. Salvacion sa banwaan kan Daraga na magsisirbeng impounding area sa mga mato-tow na kayang-kaya na maglaog nin 150 behikulo.
