LEGAZPI CITY- (Update) Tuminambad sa mga otoridad an nagkapirang kalibre nin badil, mga bala asin mga granada makalihis an isinagibong search warrant implementation na kasabay kan nangyaring engkwentro sa Brgy. Alongong, Libon, Albay.
Naka-engkwentro kan tropa kan 1st Albay Provincial Mobile Force Company asin Regional Mobile Force Batallion 5 an pigkakarkulong pitong miembro kan pigtutubudang notorious gun-for-hire na Concepcion Criminal Group.
Sa ekslusibong intrevista kan Bombo Radyo Legazpi ki PC/Insp. Diome Cardano, hepe kan Libon PNP, napag-araman na pista sa nasabing barangay kaya nahiling an presensya kan gang members mantang an mga ini man an enot na nagpaputok sa mga otoridad.
Dos minutos pa na nagkaribayan nin putok an mga ini hasta sa nag-atras an kampo kan criminal group mantang wara man nairehistrong nakulugan sa maginibong na lado.
Sa ibong na lado, nasa area man an mga operatiba kan Criminal Investigation and Detection Group (CIDG), Provincial Intelligence Branch asin pulisya kan Libon tangarig na isirbe man an search warrant kina Erwin Talagtag asin Richard Rabe sa pagbayolar sa Republic Act 10591 o Comprehensive Firearms and Ammunition Regulation Act.
Nakumpiskar sa harong kan mga ini an duwang caliber .45 pistols, duwang hand grenade asin 14 na mga bala alagad nagpalyar an mga pulis na maarestaer an mga subject persons.
Mientras tanto, padagos pang pinaghahanap ngonian an mga naka-engkwentro kan notorious gun-for-hire-group siring man an target kan search.
Magigirumduman na enot naman na ipighayag kan Police Regional Office 5 (PRO5) an crackdown kontra sa nasabing criminal group na piglalaoman na magpapababa pa sa lebel kan kriminalidad sa Bicol.
