LEGAZPI CITY- Nahahampang ngonian sa kasong pagbayolar sa section 28 kan Acta Republika Numerado 10591 o Comprehensive Firearms & Ammunition asin Acta Republika Numerado 10561 o Illegal Possession of Explosives an sarong dating barangay official kan Barangay Tabi, sa ciudad kan Sorsogon.
Ini makalihis na marekober sa harong ni dating Barangay Kagawad Elmer Espano Jr., 38-anyos an manlaen-laen na klase nin bala, armas asin bomba.
Susog sa impormasyon hale sa Gubat Municipal Police, positibo an resulta kan isinagibong search warrant implementation kan mga operatiba makalihis na makua an sarong caliber .45 pistol asin sarong magazin sa kaparehong kalibre; caliber 40 pistol asin duwang magazine para digdi; sarong hand grenade; sarong M203 ammunition, 43 na bala para sa caliber 40 na badil asin pitong pidaso man sa caliber .45 na pistola.
Mientras tanto, isinairarom naman an nasabing opisyal sa magkakanigong disposisyon.
