LEGAZPI CITY-Sarong US Sanctioned Vessel an nakumpiskar sa Gulf of Aden pagkatapos na anom na armadong lalaki an maglunad sa barko asin pinirit ining magbago nin direksyon pasiring sa Somalia, segun sa maritime security agencies.
An Seamull tanker, na midbid sa apod na SIBU 1, nagpaluwas nin sarong distress call mantang ini pigdudulok sa 136 nautical miles sa sirangan kan Al Mukalla, Yemen, segun sa shipping monitor na Vanguard.
Sinabi kan Maritime Security Centre Indian Ocean (MSCIO) kan EU na an tanker naireport na igwang sakay na anom na armadong indibidwal na ngonian iyo an nagkokontrol kan behikulo asin pigdidiretso ini pasiring sa Somalia.
Segun sa Estados Unidos nagpataw nin sanction sa Seamull tanker kan Disyembre kan nakaaging taon bilang saro sa mga sakayan sa “shadow fleet” kan Iran na inakusan nageexport nin Iranian oil gamit an deceptive shipping practices.
Saro ini sa apat na pinapaandar kan UAE-based Qatrat Alnada Almasi Ship Management na nagtransport nin mga produktong petrolyo kan Iran, kabali an naphtha asin gas oil, sa dakol na okasyon asin nagduman sa mga pantalan na kontrolado kan Houthi sa Yemen.
An piracy lakop sa baybayon kan Somalia kan taon 2000 asin nag-abot sa pinakahalangkaw na punto kan 2011 bago ini napugulan kan mga international naval deployments asin mga bagong lakdang sa seguridad para sa commercial shipping.
Alagad an mga pag’atake naglangkaw giraray poon kan Abril, na may limang barko nin kargamento na presenteng naka-hostage — an pinakahuring sarong sakayan na nakumpiskar harani sa baybayon kan Somali kan Lunes.
