LEGAZPI CITY – Nakalinyada na an mga aktibidad na gigibuhon kan Albay Veterinary Office katakod kan Rabies Awareness Month.
Segun ki Provincial Veterinarian Dr. Pancho Mella sa intrevista kan Bombo Radyo Legazpi na nakalinyada man an saindang mga aktibidad ngonian na bulan nin marso arug kan libreng rabies vaccination kan mga atamang hayop asin ikos sa saindang ofisina.
Nagsagibo na man sinda ninda nin rabies education forum kun sain pigbalehan ini kan mga estudyante gikan sa manlain-laing eskwelahan sa provincia.
Magkokondusir man sinda nin training mapadapit sa animal rabies specimen collection para sa mga Local Government Unit agricultural extension workers asin personel.
Pigtaram pa kan opisyal na piggagamit man ninda an manlain-laing platform nganing ibalangibog an saindang rabies awarness campaign siring man an saindang mga aktibidad.
Dakulang factor man suboot an mga nagbabalagaw-bagaw na ayam sa mga nagigin carrier kan virus huli ta sinda an na-eexpose sa kapwa kaining mga ayam na positibo sa rabies.
May pigpapa-otob na presenteng ley na nagsusugo sa mga Local Government Unit na magsagibo nin dog catching activity nganing maprebentaran an pagdakol kan mga balagaw-bagaw na mga ayam.
Pangapodan ni Mella sa mga pet-owners na magin responsable sa pag-ataman nin hayop asin maki-kooperar sa pigsasagibong programa kan gobierno mapadapit sa rabies awareness nganing masalbar an saindang buhay.
