LEGAZPI CITY – Nagpartisipar sa silent protest para sa ikaduwang beses an mga abogado asin nagkapirang prosecutor sa Hong Kong tangarig na magpahayag kan pagkontra sa nakasuspending extradition bill.
Sa report ni Bombo International Correspondent Federico Paragas Jr. sa Bombo Radyo Legazpi, an protesta kan nasa 3, 000 na abogado asin prosecutor kaito an nagpabungkaras kan mainit na diskusyon sa nasabing proponidong ley.
Sa isinagibong silent protest, ipighayag kan grupo an pagkontra sa pagbuwag sa mga nagsasagibo nin matoninong na protesta sa paagi nin pag-teargas.
Apektado kaya kan lakdang magin an mga gurang asin kaakian na nasa residential area harani sa mga pigkokondusiran kan protesta.
Nagdadakula man suboot an mga nakikisimpatiya huli sa nagdadakol na nagpapahiling nin isog sa pagkontra sa mga lakdang kan Hong Kong government.
Liwat man na tinawang-duon ni Paragas na nagtetenir na ‘generally peaceful’ sa Hong Kong afuera na sana sa mga lugar na piggigibuhan kan mga protesta.
Mientras tanto, aminado man si Paragas na apektado na kan mga protesta an ekonomiya kan Hong Kong.
