LEGAZPI CITY – Padagos na nagpaparahay ngunyan an sarong menor de edad makalihis na magsapar nin lugad sa manlaen laen na parte kan saiyang hawak.
Ini makalihis na pagbabadilon an biktimang si Johnwel Bemeda, 17-anyos kan P-4 Comon, Tabaco City kan dae pa nabibistong mga suspetsado.
Segun sa impormasyon, mantang lunad kan saiyang motorsiklo an biktima ngani sabaton an saiyang amigo, bigla ining binato nin kaputol nin kawayan rason ngani na matumba ini sa pigmamanehar na motorsiklo.
Mantang nasa tinampo an biktima, nagkapirang beses ining binadil kan dae pa nabibistong suspek asin suwerteng nadulag ini asin nakahagad nin tabang.
Napag-araman na sarong Tirzo Bolanos an nagdara ki Bemeda sa ospital kun sain padagos ining pigtatawan nin medikal na asistensya makalihis na magsapar nin tama nin bala sa saiyang walang braso asin mga lugad sa noo, tuong kamot asin tuhod.
Sa presente nagpapadagos an ipigkokundusir na imbestigasyon kan mga kapulisan para sa pagkakabisto kan mga suspetsado asin maaraman an motibo sa nasambitan na pambabadil.
