LEGAZPI CITY — Gadan an sarong menor de edad sa nangyaring insidente nin pambabadil sa corner kan Peralta St. asin Jesalva St., Brgy. Talisay, ciudad kan Sorsogon.
Nagluluwas sa inisyal na imbestigasyon na naglalakaw an biktimang si alyas ‘Tyson’ kan magdulok an sarong lalaki na nakasulot nin itom na hoodie jacket asin warang habas kaining pinaputukan kan dae pa maaraman na kalibre nim badil an biktima.
Nagsapar nin tama sa manlaen-laen na parte kan hawak an menor de edad na rason kan tulos na pagkagadan.
Nagdulag man an nasabing suspek pasiring sa direksyon kan Pilot Elementary School sa nasabing barangay makalihis na isagibo an krimen. Dae pa man maaraman kun ano an posibleng motibo kan nasabing insidente.
Sa presente, isinairarom na sa autopsy examination an nasabing bangkay mientras na padagos pang pighahanap an suspek sa krimen.
