LEGAZPI CITY- Ipigproponir kan Department of Social Welfare and Development (DSWD) Regional Office 5 sa partner agency na United States Agency for International Development (USAID) sa irarom kan World Food Program an konstruksyon kan mechanized repacking warehouse sa provincia kan Albay.
Pag-eksplikar ni DSWD Bicol Dir. Arnel Garcia sa intrevista kan Bombo Radyo Legazpi, kakayanon suboot kan nasabing pasilidad an pagrepack kan 50, 000 na foodpacks sa laog sana kan sarong aldaw gamit an makina.
Tinawang-duon pa ni Garcia an pangangaipo digdi urog na nakabantay pirmi sa marikas na relief support sa tahaw kan mga nag-aabot na bagyo, pag-aalburuto an bulkang Mayon asin bulkang Bulusan sa Sorsogon mantang nakadesignar man na magpakaon sa sur na porsyon kan Metro Manila sa pigkakahandalang the Big One.
Bukas man sa suhestiyon si Governor Al Francis Bichara mientras na ipig-ofrecir pa suboot an sarong lote sa banwaan kan Camalig tangarig na pagtugdukan kaini.
Napag-araman na nagkakantidad nin $3 million an high-tech na pasilidad na kapareho kan model na yaon sa Pakistan.
Mientras tanto, maogma pang ipigheras kan opisyal na positibo man reaksyon kan World Food Program sa nasabing rekomendasyon.
