LEGAZPI CITY- Padagos an paglilibot ngonian kan Municipal Disaster Risk Reduction and Management Council (MDRRMC) Panganiban sa Catanduanes makalihis an pagtama kan Magnitude 5.0 quake.
Namatian an pagyugo bandang alas-2:00 kasubagong maagahon na sentro an nasabing banwaan asin piglalaoman an aftershocks susog sa abiso kan Philippine Institute of Volcanology and Seismology (PHIVOLCS).
Sa ekslusibong intrevista kan Bombo Radyo Legazpi ki MDRRMC Panganiban officer Eusebio Valledor, pig-iinspeksyon na an mga posibleng destroso sa vital installations asin mga edificio.
Hinali man ni Valledor an paghadit kan mga coastal barangays kan Cagdarao, Panay, Maculiw asin Babaguan na nakahampang sa Pacific Ocean.
Wara man na inisyung tsunami advisory an PHIVOLCS.
Aminado an opisyal na ini an pinakamakusog na linog na namatian sa lugar makalihis an nagkapirang taon.
