LEGAZPI CITY- Tatawanan nin dugang na security support an mga alkalde na nakakaresibe nin huma sa buhay urog na sa critical areas na may presensya pa man giraray kan New People’s Army (NPA).
Segun ki League of Municipalities of the Philippines (LMP) Albay Chapter President asin Jovellar Mayor Jorem Arcangel sa intrevista kan Bombo Radyo Legazpi na ginibo ni Presidente Rodrigo Duterte an pahayag sa nagpapadagos na meeting kan mga alkalde kan Luzon Area na nasa Davao City ngonian.
Mayormenteng obehto kan presidente sa lakdang na ma-maximize kan mga incumbent officials an oras sa pagpasiring sa mga lugar na delikado kaya papadugangan an mga nakabantay na pulis.
Sa ibong na lado, klinaripikar man ni Mayor Arcangel na mahigot an direktiba ni Presidente Duterte na dae pagamiton an dugang na security sa kampanya mantang dae man pwedeng mag-avail kaini an mga mayors na kaibanan sa narco-list.
Napag-araman na nasa 85 pa suboot an mga opisyal an kaibanan sa nasabing listahan alagad dae naman isinaysay ni Duterte kun anong posisyon an pigkakapotan kan mga ini sa gobierno.
