LEGAZPI CITY- Ipig-orgulyo kan ama kan ciudad kan Legazpi an panibagong world forum na inatendiran kaini sa Berlin, Germany kun saen napili ini bilang saro sa mga panelist.
Dae maitago ni Mayor Noel Rosal an dakulang pasasalamat na magin saro sa tolo sanang alkalde sa Pilipinas na nakaiba sa nasabing biyahe kasabay an mga non gevernment organizations asin iba pang pamayo kan mga ahensya.
Inapod pa kaining ‘productive’ an pag-atendir sa World Forum on Migration kun saen saro ini sa mga nagin presenter.
Kasabay sa mga tinukar kaini sa nasabing pagtiripon an kamugtakan kan mga overseas Filipino workers (OFWs) kun saen napag-araman na labi sa 5, 000 na mga OFWs an gikan sa Legazpi na natatawanan nin tsansa na magpahayag kan boses sa mga isyu, triangulated effort kan simbahan, LGU asin komunidad, siring man an pagpapakusog kan territory of origin o tabang kan negosyo asin health services.
Aminado man ini sa dakulang ambag na naitatao kan remittances kan mga OFWs sa Pilipinas. Sa ibong na lado, pighihiling na oportunidad ni Rosal an pagatendir sa okasyon urog na mae-expose an pangaran kan ciudad.
