LEGAZPI CITY- Nagrarahay na suboot an kamugtakan kan salud ni Daraga Mayor Carlwyn Baldo makalihis na darahon sa ospital huli sa pagsiong kan daghan asin suboot asthma attack.
Sa intrevista kan Bombo Radyo Legazpi ki PNP CIDG Albay Chief PC/Insp. Ronnie Fabia, marhay na suboot an lebel kan blood sugar asin blood pressure kan alkalde, susog na man sa impormasyon kan personaheng nakabantay sa sarong ospital sa ciudad kan Legazpi.
Nagpasiring man an mga staff kan health services kan Police Regional Office 5 (PRO5) tangarig na maaraman an enterong kamugtakan kaini alagad pighahalat pa an magigin desisyon hale sa attending physician ni Baldo na si Dr. Edberto General.
Segun pa ki Fabia, igwa pang isinagibong eksaminasyon sa fluids ni Baldo asin ngonian na aldaw piglalaomang mailuluwas na an resulta.
En kaso man na magin marhay na an kondisyon kaini asin tugutan nang makaluwas sa ospital, magtetenir pa suboot ini sa kustodiya kan PNP CIDG an alkalde hasta wara pang ipigluluwas na commitment order an korte kun sain na pasilidad ini magtetenir, siring man kun maprobarang may probable cause an mga kinakahampang na reklamo.
Enot nang inasegurar kan opisyal na warang mangyayaring “VIP treatment” sa nasabing alkalde.
Magigirumduman na inarestar si Baldo kan Martes makalihis na sirbihan nin search warrant asin nahahampang sa mga kasong illegal possession of firearms and ammunition asin illegal possesion of explosives.
