LEGAZPI CITY — Pigbuyagyag kan Criminal Investigation and Detection Group (CIDG) na saro sa mga pigkokunsiderar ngunyan na opsyon an paglipat ki Daraga Mayor Carlwyn Baldo sa PNP-Camp Crame Gen. Hospital enkaso kaipuhan pa kaini nin confinement.
Segun ki CIDG Bicol chief Sr. Supt. Arnold Ardiente, under police custody an alkalde kaya kinakaipuhan na naka-confine man ini sa PNP hospital o government hospital basado sa pigsusunod na polisiya kan ahensya.
Kinumpirmar man kan opisyal na totoong igwang kamatean si Baldo katakod kan ipinaluwas na medical abstract kan attending physician.
Sa ibong kaini, pigduon ni Ardiente na nasa marhay na kondisyon na an alkalde makalihis tugutan kan doktor na ma-discharge na ini na nangangahulugan na bako na suboot ‘life threatening’ an helang kaini.
Dugang pa kan opisyal na maski pa nailuwas na sa ospital si Baldo, ipagpapadagos man giraray an saiyang medikasyon.
Mientras tanto, pigduon man kaini na na nadakop sa akto an alkalde na nagkomiter nin krimen kan madakupan nin iligal na mga armas kaya may basehan an warrantless arrest huli ta nag-positibo suboot an nagin resulta kan ipigkondusir na search warrant.
