LEGAZPI CITY — Consistent an ipigpapahiling na aktibidad kan bulkang Mayon sa mga nakalihis na oras segun sa datos kan Philippine Institute of Volcanology and Seismology (Phivolcs).
Sa eksklusibong intrevista kan Bombo Radyo Legazpi kay Phivolcs Dir. Renato Solidum, nasa third phase na an nahihiling na volcanic activity sa padagos na pagluwas kan lava na pigsasabayan kan tilamsik kan lava fountaining.
Naobserbaran suboot sa enot na phase an pagtibag kan sa 2014 lava dome kasabay kan pagkrear sa bagong dome na pinagpupuunan kan mga rockfall events mantang nahiling sa second phase an moderatong kusog na pagsabog asin lava fountaining.
Mientras tanto, pigkokunsiderar man kan ahensya na pinaka-energetic na seismic activity record sa bulkan an nangyari kasubanggi hasta ngunyan na aldaw kun sain nairehistro kan mga instrumento an padagos na pag-glow asin an rambling sound.
Dae man nagpupundo an episodes kan bulkan kun sain sinabayan an lava flow nin pagbuga kan abo na kadaklan an kolor puti na indikasyon na igwang kaibanan na tubig an pagputok.
Nagpatanid man an Phivolcs sa suboot na permanenteng peligro na nakaamba sa mga natipon na volcanic materials apwera pa sa mga lumang debris na posibleng ibaba enkaso magkaigwa nin makusog na bulos kan uran.
