LEGAZPI CITY-Padagos an obserbasyon kan Philippine Institute of Volcanology and Seismology (Phivolcs) sa bulkang Mayon kun sain nagkakaigwa ini nin harmonic tremor na nagreresulta sa lava fountaning events hale sa crater kaini.
Segun kay Phivolcs Volcano Monitoring and Eruption Prediction Division Chief Mariton Bornas, sa intrevista kan Bombo Radyo Legazpi na nagkakaigwa nin maluway na progreso an bulkan sa mas energetic na minor strombolian activity o an paminsan-minsang pagpisik kan mga fragment kan lava sa crater.
Paliwanag ni Bornas na ini an mga short live lava fountaning events na nagkakawsa nin pagtaba sa mga lava flows sa tulong gullies (Mi-isi, Bonga, Basud).
Padagos man an pagkrear kaini nin rockfall, panaka-nakang pyroclastic density currents o uson, asin volcanic earthquakes na kadaklan low frequency volcanic earthquakes na konektado sa minor strombolian activity kan bulkan.
Dagdag pa kan opisyal na dai masyadong nahihiling tuyong aldaw an mga incandescent o episodic na pagpisik kan lava fragments o lava fountaning.
Alagad kalimitang kulay na itom na abo ini na senyales kan minor strombolian activity at short live lava fountaning kan bulkang Mayon.
Mientrastanto, paliwanag kan Phivolcs na magkaiba an pinunan kan magma kan Bulkang Mayon asin Bulkang Bulusan asin warang epekto an pagputok kan saro sa mga ini sa kada saro.
Alagad huli ta kadaklan sa mga ini, iyo an highly active volcano, kun kaya dai posibleng magkasabay an aktibidad kan mga ini.
