LEGAZPI CITY — Padiit-diit nang nababawasan an numero kan mga evacuees sa probinsya kan Albay makalihis ibaba sa alert level 3 an status kan Bulkang Mayon na nangangahulugan na pagpapa-decamp sa mga residente na nasa 8 kilometer extended danger zone.
Hali sa dating 65,000 o kabilugan na 65, 493 evacuees hali sa mga banwaan kan Daraga, Camalig, Malilipot, Guinobatan, Bacacay, asin Sto. Domingo asin mga ciudad kan Ligao, Tabaco, asin Legazpi, pinaglalaoman na mababa na ini sa labi sa 10,000.
Segun ki Albay Public Safety and Emergency Management Office (APSEMO) chief Dr. Cedric Daep, an mga nasa laog na sana kan 6km Permanent Danger Zone an magtetenir ngonian sa mga evacuation centers sa provincia.
Pag-eksplikar kaini, wara man kayang nagtetenir sa 7 KM Extended Danger Zone alagad digdi nagtatanom an kadaklan sa mga paraomang Albayano.
Mientras tanto, segun sa Provincial Disaster Risk Reduction and Management Council (PDRRMC), mawawalat sa mga evacuation centers an nasa 2, 666 na nasa 6km PDZ asin padagos na hahatudan kan pangangaipo kan mga ini.
