LEGAZPI CITY-Maeeksperyensyahan an mauran asin malipot na panahon sa nacion, kabale an Bicol Region sa bulan kan Enero hasta Pebrero.
Segun kay Weather Specialist Melvin Almujela sa intrevista kan Bombo Radyo Legazpi na huli ini sa epekto kan Northeast monsoon o amihan sa Southern Luzon asin Visayas, kun kaya natural na namamatean an mauran asin malipot na panahon.
Mantang Shearline man an makakaapektar sa Bicol Region partikular na sa Catanduanes kun sain makakaekperyensya nin kalat-kalat na paguuran, pagkikilat asin pagdaguldol na maghahaloy poon sa aldaw nin Domingo sagkod sa Miyerkules.
Sa iba pang parte kan Bicol Region, Northeast monsoon o amihan an makakaapektar na posibleng magdara nin maulap na kalangitan asin mauran na panahon.
Dagdag pa kan State Weather Bureau na posibleng magresulta ini sa pagbaha asin pagrasay nin daga orog na sa mga nasa landslide prone area.
Nagpaluwas man nin gail warning sa nagkapirang kadagatan sa rehiyon kun kaya pigaabisuhan an mga saradit na parasisira na dai muna magpalaot.
Mantang may paguran hababa man an tsansa alagad posibleng magkaigwa nin lahar flow sa parteng harani sa Bulkang Mayon.
Mientrastanto, dai man pighahale an posibilidad na magkaigwa nin sarong bagyo sa bulan kan Enero alagad sa ngonian wara pang Low Pressure Area o anumang bagyo an makakaapektar sa bilog na nacion.
