LEGAZPI CITY—Pig-asigurar kan kapulisan kan banwaan nin Matnog, Sorsogon an kaligtasan kan mga stranded na biyahero sa Matnog port makalihis na isuspendir an mga biyahe kan mga lunadang pandagat dara kan posibleng epekto kan bagyong Ada.
Segun ki Matnog Municipal Police Station Chief of Police Station Police Captain Wilfred Lloyd Berdin, sa intrevista kan Bombo Radyo Legazpi, na 24/7 igwa nin police visibility sa nasabing pantalan.
Dugang kaini na sa pakikipagkoordinar man sa Municipal Disaster Risk Reduction Management Office yaon an saindang opisina na magtaong asistensya en kaso man na magpaotob nin forced evacuation sa mga residentes.
Nagpatanid an opisyal sa mga biyahero na maagi sa Cebu asin Surigao asin mabiyahe pasiring sa Matnog port na dae muna magpadagos sa naunambitang pantalan huli sa pig-aantisiparan na sinda mai-stranded dara kan epekto kan bagyo.
Mensahe pa ni Berdin sa mga stranded sa Matnog port na preparado an saindang personahes na magtaong asistensya sa kun ano man an saindang kinakaipuhan na tabang.
