LEGAZPI CITY- Nakatalaan na magpaabot nin tabang an Bureau of Fisheries and Aquatic Resources Bicol sa mga parasisirang naapektaran kan mga magkakasunod na kalamidad na tuminama sa rehiyon.
Marurumduman na basado sa datos kan ahensya na nasa P30.8 million an pigkakarkulong danyos sa sektor kan pagsisira.
Nasa 1, 318 na mga fisherfolks man an naapektaran an kabuhayan huli sa mga kalamidad kun sain pinakadakol an sa provincia kan Catanduanes na pigsusundan kan Camarines Norte asin Camarines Sur.
Segun ki Bureau of Fisheries and Aquatic Resources Bicol spokesperson Rowena Briones sa intrevista kan Bombo Radyo Legazpi na nag-abot na an mga materyales na ipapanao sa mga apektadong parasisira na magagamit kan mga ini para sa pagpapakarahay kan nadistroso nindang mga bangka.
Afuera sa nasabing mga materyales, magtatao man ahensya nin mga fingerlings para sa mga aquaculture area na na-wash out kan mga nakaaging bagyo.
Segun pa sa opisyal na magiging prayoridad muna sa ngunyan an pinakamatinding naapektaran huli ta limitado pa an pondo kan ahensya ngani na maitao an gabos na pangangaipo kan mga affected fisherfolks.
