LEGAZPI CITY — Nagkrear nin special task group an Police Regional Office 5 (PRO5) kan Bicol sa provincia kan Masbate na parte kan preparasyon para sa papaabot na pirilian sa barangay asin Sangguniang Kabataan (SK).
Sa intrevista kan Bombo Radyo Legazpi kay PRO5 spokesperson PS/Insp. Ma. Luisa Calubaquib, mismong si PNP Bicol Dir. PC/Supt. Antonio Gardiola Jr. an naghagad kan datos sa mga provincia kan rehiyon na igwang haralangkaw na insidente nin pambabadil.
Digdi napag-araman na an Masbate an nangengenot sa nasabing listahan kun saen nairehistro an nasa 42 shooting incidents puon kan Enero 1 hasta Marso 28 kan presenteng taon mantang pigsusundan kan provincia kan Camarines Sur sa 20 kaso.
Sa presente, pighahalat na sana an pangaran kan magsisirbeng task group commander siring man an kabilugan kan team na nakatalaan nang ideploy sa Masbate sa obhetong mamantenir an paz y orden sa kabilugan kan election period.
