LEGAZPI CITY—Ipiglatag na kan Masbate Police Provincial Office an saindang mga preparasyon para sa paparaning Semana Santa magin sa panahon nin bakasyon sa provincia kan Masbate.
Segun ki Masbate PPO PIO PCPT Estrella Torres, sa intrevista kan Bombo Radyo Legazpi, na matao an saindang mga personahes nin security asin public safety coverage sa panahon kan Semana Santa.
Ipinaliwanag kan opisyal na bilang parte kan saindang security plan, magkakaigwa nin awareness campaign asin pagkoordinar sa Advocacy Support Groups.
Afuera digdi, makikipagkoordinar man sinda sa highway patrol team para magtao nin road safety markers sa mga terminal, pantalan, asin eropuerto sa nasambitang provincia.
Dugang kaini na padagos man an pagpapaotob nin Commission on Elections (COMELEC) checkpoints kan saindang mga personahes.
Sinabi pa ni PCPT Torres na magkakaigwa nin maximum enhance police presence sa mga bulnerableng lugar.
Mabugtak man nin motorist assistance desks centers asin police assistance desks siring man nin mga medical practitioners sa mga manlaen-laen na lugar kan naunambitang provincia ngani na mas maparikas an pagtabang kan mga kapulisan en kaso magkaigwa man nin mga emerhensya.
Magkakaigwa man nin road clearing operations an saindang mga kapulisan ngani na maasigurar an kaligtasan sa mga tinampo.
Dugang digdi na nakikipagkoordinar na man an Masbate PPO sa iba pang ahensya siring kan Armed Forces of the Philippines, Philippine Coast Guard, asin Bureau of Fire Protection ngani na magtabang sa pagpapaotob nin kaligtasan asin seguridad.
Mientrastanto, nangapudan man ini sa publiko na magsunod sa mga pigpapaotob kan mga kapulisan asin makipagkooperar ngani na magin maayos asin magin organisado an pagsabat kan Semana Santa asin bakasyon sa provincia.
