LEGAZPI CITY- Mas pinahigot pa sa ngunyan kan gobyerno kan Masbate an pighahagad na rekisitos kung sain solamenteng an mga fully vaccinated na kontra sa COVID 19 an tutugotan na makalaog sa provincia.
Sa intrevista kan Bombo Ladyo Legazpi kay Pio Duran MDRRMO head Noel Ordoña, epektibo na an nasabing kasuguan kan gobyerno provincial kan Masbate na obhetong mapugolan an paglaog kan mas nakakaolakit na Delta variant nin COVID 19.
Napag-araman na saro an Pio Duran port sa mga apektado kan nasabing restriction huli ta sa pantalan kan banwaan nag-aagi an mga biyaherong mapasiring sa Masbate.
Segun kay Ordoña, dakol na sa ngunyan an mga stranded na pasahero na dae naman pigtutugotan pa na makalunad nin barko huli ta dae pa nababakunahan.
Apwera sa fully vaccinated kaipohan na 15 aldaw na an nakakalihis kan matawanan kan second dose antes an pagbiyahe asin pighahagadan man giraray nin travel pass.
Sa ngunyan solamenteng an mga delivery trucks na nagbabiyahe nin essential goods palaog sa provincia an pigtutugotan na makabiyahe asin makalunad nin barko sa Pio Duran port.
Hagad ngunyan kan opisyal an pagsabot kan publiko asin inabisohan na an mga biyahero na siertohon na nakakompleto na kan rekisitos nganing maibitaran na mastranded sana sa pantalan.
