LEGAZPI CITY- Nakakaag sa alanganing sitwasyon an ekonomiya kan Pilipinas kun padagos pa an paglangkaw kan presyo kan mga barakalon mantang wara man na nagigin adjustment sa pasweldo sa mga obrero.
Ini an base sa paghiling ni dating Trade and Industry Secretary Mar Roxas sa intrevista kan Bombo Radyo Legazpi katakod kan pagpasar bilang ley kan Tax Reform for Acceleration and Inclusion (TRAIN) Law.
Segun ki Roxas, naobserbaran an mas pagdificil kan buhay kan mga pamilyang Pilipino kasunod naman kan pagmahal kan presyo kan mga produktong pig-aangkawt sa nacion siring na sana kan petrolyo, bakal asin lata.
Ipig-ehemplo pa kan dating opisyal na nasa P46 hasta P48 sana kaito an ribayan kan piso sa sarong dolyar alagad nagsakat na sa labi P53 sa presente.
Dugang pa ni Roxas na dawa pa dakol na establisyemento de negosyo an ipigkakaag, dae man naghihiro an minimum wage o ganansya kan mga ordinaryong namamanwa kaya bako man giraray balansyado.
Katakod kaini, ipinagirumdom ni Roxas sa mga tagapamayo kan nacion an ugat kan pagsiserbisyo na kaibanan an kagaanan sa mga kahimanwa asin pagtalubo kan ekonomiya.
