LEGAZPI CITY- Nangapudan an Commission on Human Rights sa gobyerno na mas matanos na maipaotob an mga ley na nagtataong proteksyon para sa mga kababaihan kasabay kan obserbasyon kan Women’s month ngunyan na bulan nin Marso.
Sa intrevista kan Bombo Radyo Legazpi kay CHR Bicol Director Atty. Arlene Alangco, dakol na mga ley sa Pilipinas an binilog ngani na mapangatamanan an mga derechos kan kababaihan asin maibiataran na maging biktima nin pang-aabuso.
Kaiba na suboot digdi an Acta Republika numerado 9262 o an Anti-Violence Against Women and their Children na haloy naman na naisaley sa Pilipinas.
Alagad problema suboot na dae man talaga ini naipapaotob nin matanos kung kaya dakol man giraray an mga kaso nin pang-aabuso sa mga kababaihan asin mga jovenes.
Pangapudan ni Alangco na ngunyan na bulan kan mga kababaihan, mas matawanan nin atensyon an mahigot na pagpapaotob kan mga ley asin polisiya kan gobyerno na nagtataong proteksyon sa mga kababaihan.
Inasegurar man ni Alangco na yaon an CHR na preparado na magtao nin suporta asin tabang sa mga kababaihan na biktima nin pang-aabuso.
