Piglalaomang mas dakol pang ebidensiya pa an isusunad kan prosecution team laban kay dating Pres. Rodrigo Duterte sa mga masunod na aldaw.
Kasuhapon an ipinasakamot na kan prosecution an enot na set kan mga ebidensiya sa International Criminal Court (ICC) asin sa kampo kan dating presidente.
Ini an pigbibilog kan 181 piraso na mga ebidensiya na nakatalaang ipresenta sa paggulong kan trial laban sa dating presidente.
Siring man, piglalaomang isusunad pa an ibang pidaso kan ebidensiya sa mga masunod na aldaw, bago an deadine na April 4 na ibinugtak kan international court.
Kinababalehan ini kan mga written documentation, mga ladawan, video, asin audio recording.
An natatadang ebidensiya, kabale an posibleng mga iprepresentang testigo kun igwa man, an kaipuhang i-disclose kan prosecution team bago magpaso an deadline na itinala kan international court.
Basado sa polisiyang pigsusunod kan naunambitang korte, dapat an amay na maimpormaran an ICC-Pre Trial Chamber I kun balak kan prosecution na maghagad nin protective measure sa mga testigo asin biktima na mawot kaining ipresenta, kabale na an iba pang indibidwal na pwedesir mahampang sa anumang huma, kun enkaso iluluwas an saindang identidad.
Mientrastanto, igwa mang hasta April 11 an kampo kan dating presidente nganing isumite an mga counter-evidence nito.
Kaipuhan mang impormaran kan Duterte camp an ICC kun igwa ining mga testigo sa nakatalaang confirmation hearing.
