LEGAZPI CITY — Target kan Kamara an posibilidad na dugangan an ferry boats na regular na ma-biyahe pasiring sa Northern Samar asin rehiyong Bicol.
Segun ki Rep. Cesar Sarmiento, an ideya kan pagkkaigwa nin dugang na schedules an kasunod kan konklusyon kan enot na “House of Representatives Western and Eastern Nautical Highway Expedition” kan Marso 17 hasta 27.
Segun sa pamayo kan House committee on transportation, kaipuhan na magsunod sa schedule kan paghale an gabos na lantsa na rehistrado sa Maritime Industry Authority (MARINA).
Sinabi pa ni Sarmiento na kun dae man magsunod, saro ining pagbalgar sa diretsos kan publiko na maihatod kan lantsa sa tamang oras.
Nagkakawsa kaya nin pagkaulang an mga lantsa na dae nagsusunod sa idenisignar na schedule sa parehong pasahero asin kalakal asin napapahaloy pa an oras kan pagbiyahe.
Ikinundusir an House of Representatives Western and Eastern Nautical Highway Expedition ngane na matawanan an mga lehislador nin first-hand perspectives sa estado kan roll-on roll-off (RORO) projects kan gobyerno, kondisyon kan road network asin an transportation system sa mga probinsya.
Dugang pa ni Sarmiento, nagtao man an ekspedisyon nin first hand information sa mga lehislador para sa 2018 budget season asin ngane na maaraman kun igwa nin potensyal asin eksistidong proyektong pang-imprastraktura asin panturismo na kinakaipuhan nin pondo hale sa gobyerno.
