LEGAZPI CITY — Nag-aangray an sarong paratienda nin burak sa Legazpi City Public Market makalihis na mawara an saiyang bag kun sain nakabugtak an dilensya asin mga importanteng ID.
Aminado si Myrna Ilagan na turog sya kan mawara an nasambitan na gamit kun kaya dae nya nariparo kun siisay an naglaog sa saiyang pwesto.
Ikinadagit ni Ilagan an pagsayuma suboot kan Market Administrator na si Julius del Rosario na ipahiling an CCTV footage sa paglaom na nakuahan kaini an naghabon sa saiyang bag.
Sa intribista kan Bombo Radyo Legazpi ki Del Rosario, tinawan duon kaini na ipinagbabawal ninda sa mga paratienda an magbugtak nin kwartong turugan sa mga pwesto siring na man an pagkaturog sagkod sa dae pa ipigsasarado an tindahan.
Enot na insidente suboot ini sa Legazpi City public market.
Sinabi pa ni Del Rosario na haloy na sindang nagpatanid sa mga nagtitienda sa lugar na maglikay ngani na dae mabiktima kan mga kawatan.
Liwat man ining nagpagirumdom sa mga paratienda na magin marigmat huli ta dakol an tawong nagluluwas-laog sa merkado.
