LEGAZPI CITY – Nagpapadagos an operasyon kan maritime police ngani na dagos nang malinigan an kadagatan kan probinsya kan Masbate.
Segun ki Masbate Provincial Director Police Senior Superintendent Froilan Elopre, sarong bulan makalihis na ilansar an Oplan Sagip Karagatan nakadakop na an mga otoridad nin 40 persona na imbwelto sa iligal na pagsisira asin nakakumpiskar nin sarong fishing vessel, walong fishing boat, walong motorized bangca asin 782 kg nin manlaen laen na klase nin sira.
Pighayag man kan opisyal na dae man sinda nadidifisilan sa saindang trabaho huli ta yaon sa sainda an suporta kan gobernador kan probinsya asin yaon man an pagtatarabangan kan mga ahensya kan gobyerno kaya dakol na resources an nagagamit kan PNP.
Dugang pa ni Elopre, saro pa sa nakakatabang na makaenganyar sa publiko na makipagtabangan, iyo an nareresibeng reward kan mga ini huli ta igwang pigtagama na pondo an provincial government kan Masbate.
Pigduon man kan opisyal na wara sindang pigpipili huli ta warang siisay man na mas halangkaw sa ley.
