LEGAZPI CITY – Nagtao na nin mga special permits an Maritime Industry Authority (MARINA) Bicol sa mga shipping lines kasunod kan rehabilitasyon kan San Juanico Bridge na nagkokonektar sa Samar asin Leyte.
Segun ki Maritime Industry Authority Bicol Regional Director Atty. Maximo Bañares sa intrevista kan Bombo Radyo Legazpi na kan pig-anunsyar kan Department of Public Works and Highways an pagpapakarhay kan nasabing tulay an may sarong shipping company an nag-apply nin special permit para sa rutang Tacloban to Basey, Samar.
Alagad nagkaigwa ining problema huli ta dae pa pwede sa presente mag-akomodir nin mga roro an piggigibong port sa Basey kun kaya nakikipagkoordinar sinda sa saindang counterpart sa region 8 para sa pagsasa-ayos kaini.
Padagos man suboot an pagpapakarhay kan mga ports sa nasabing rehiyon nganing makalaog an mga roro vessel nganing dae na magkaigwa nin congestion sa mga ports sa rehiyon Bicol.
Pigtaram pa kan opisyal na nakikipag-olay na man sinda sa sarong shipping lines nganing madugangan an ruta kaini haleng Pioduran na maagi sa Masbate, Biliran, Southern Leyte asin vice versa.
Mawot nindang magtao nin mga special permit nganing mabawasan an nabibilog na build-up kan mga stranded sa mga nasabing lugar na nadudugangan hasta sa ngonian.
Dapat man suboot na ipreparar kan mga Local Government Unit asin iba pang ahensya an mga ports na gagamiton sa mga special permit nganing makadalagan nin maray an mga vessel.
Pig-asigurar man ni Bañares sa mga byahero asin mga driver na piggigibo kan Marina an gabos nganing masulusyonan asin matawan nin alternatibong paagi nganing mabawasan an stranded na pasahero huli sa pagsarado kan San Juanico Bridge.
 Bicol has issued special permits to shipping lines following the rehabilitation of the San Juanico Bridge connecting Samar and Leyte.){kind=link}