LEGAZPI CITY – Rinibong tawo an nakisumaro sa mga protest rally sa manlain-laing parte kan Australia urog na sa Sdyney.
Segun ki Bombo International News Correspondent in Australia Denmark Suede na inapod ining march for Australia na kun sain may manlain-laing man na obheto an mga grupo sa saindang pag-martya.
Paghistorya niya na kan nakaaging panahon an piggigibo sanang tapokan nin mga bilanggo kan Britain an Australia alagad kan 1851 an nagdakol bigla an mga migrants kun sain 40,000 na mga chinese an nag-abot sa laog sana nin 20 taon.
Kan mabilog suboot an nacion na Australia an nagkaigwa nin white Australian policy kun sain dae ka pwedesir maglaog kun bako ka puti o bako ka hale sa Inglatera asin natanggal sana kan 1973 asin digdi na nagbukas an nacion para sa migrants na hale sa manlain-laing parte kan kinaban.
Pigtaram pa kaini na obheto kan ibang grupo na ikondena an pagkuwa kan mga migrants sa mga trabaho na dapat sa mga Australiano asin an ibang nakikisumaro iyo an mga anti-migrants mantang an ibang grupo an nagsasagibo nin protesta nganing kontrahon man an punto kan mga anti-migrants.
An makaulok suboot na nagbabakal an mga anti-migrants sa mga produktong pigtitienda kan mga counter protest sa ibong kan aram ninda na mga migrants an mga kagsadiri kan mga tiendahan.
Kun ikokompara an masasabi niyang mas malala an racism na nangyayari sa Estados Unidos kumpara sa Australia huli ta pwedesir na magsumbong an na-bully patungkol sa saiyang kulay na pwedesir na maghantong sa pagkawara kaini nin trabaho.
Nanindugan si Suede na sagkod warang pigbabayolar na ley asin pigkukulugan na mga law enforcement agencies an pwedesir sindang magsagibo nin mga hiro protesta asin magayon an pagpapa-otob kan maximum tolerance kan mga Australian Police maski nakukulugan na sinda huli ta pepper spray sana an piggagamit ninda hangga’t pwede.
