LEGAZPI CITY – Padagos an pigkokondusir na reading interventions kan mga paratukdo sa Gubat North Central School nganing mapauswag asin masuportaran an pagbasa kan mga estudyante.
Segun ki Michelle Rubio, Master Teacher 2 kan naunambitang eskwelahan sa intrevista kan Bombo Radyo Legazpi na kabale digdi an Academic Recovery and Accessible Learning (ARAL), Pink Techno Classhome, Pamilyang bumabasa program asin iba pa nganing suportaran an kakaipuhanan kan mga kaakian sa pagbasa asin mapa-uswag an saindang literacy skills.
May ipigtugdok man suboot sindang reading pharmacy kun sain digdi masubli an mga magurang kan mga reading materials na saindang gagamiton sa Pamilyang bumabasa program na saro sa parte kan National education program kan Department of Education sa pagbabasa.
Ikinaugma niya man an pigpapahiling na suporta asin koordinasyon kan mga magurang sa saindang inisyatiba nganing makanood an ibang mga kaakian kun sain an iba sa mga ini an malaog pa sana sa elementarya.
Pigheras pa kan opisyal na igwa man sindang pigtugdok na reading park sa saindang eskwelahan na may katuyuhan na magbonding an mga magurang asin aki sa paagi nin pagbasa kan mga booklet partikularmente na an mga naghahatod nin mga pagkaon asin guardian kan mga estudyante.
Pagdoon niya man na dapat igwa nin routine an mga kaakian sa pagbabasa kun kaya pighahagadan man ninda nin video sa mga magurang bilang katunayan na nagsusunod an mga ini sa saindang pigpapa-implementar na reading interventions.
Pangapodan man ni Rubio sa gabos na dae magsawa sa paggibo nin inisyatibo nganing matukduan an mga kaakian na magbasa mantang pighagad sa mga magurang na bawasan an pagbabad kan saindang mga aki sa social media asin tukduan na magbasa maski ngonian na mabakasyon na.
