LEGAZPI CITY- Nagkondusir nin mga programa asin aktibidad sa EDSA shrine an nagkapirang mga grupo bilang pagkomemorar sa EDSA People Power Revolution.
Segun ki August Twenty-One Movement President Volt Bohol sa intrevista kan Bombo Radyo Legazpi na mawot ninda na masabutan kan mga jovenes na nagtetenir na importante hasta sa ngunyan an mga kaganapan sa People Power Revolution.
Makalihis man na ideklarar kan Malakanyang an Pebrero 25 bilang Special Working Holiday, inomaw kan grupo an pagkukusa kan mga unibersidad sa pagkanselar kan klase ngani na makapag obserbar kan nasabing aktibidad.
Nanindugan man an grupo na dae dapat na pag-akseptaron kan mga namamanwaan an naglalakop na mga fake news pag-abot sa mga kaganapan sa EDSA People Power Revolution.
Paliwanag ni Bohol na tiningala kan bilog na kinaban an pagkakasararo kan mga namamanwaang Pilipino durante kan nasabing panahon ngani na maabot an demokrasya.
