LEGAZPI CITY- Nagkaigwa nin mga aktibidad ngunyan na aldaw sa Cative, Rizal park asin sa iba pang parte kan nacion katakod kan selebrasyon kan National Flag day.
Segun ki National Historical Commission of the Philippines Historical Sites Researcher Eufemio Agbayani III sa intrevista kan Bombo Radyo Legazpi na importante na maipahiling an pagtataong importansya sa bandera kan nacion.
An National Flag Day an preparasyon para sa aldaw kan Kalayaan na iko-komemorar sa Hunyo 12.
Marurumduman na kan an presenteng aldaw an simbolo kan enot na pagwawagayway kan bandera makalihis madaog kan Philippine Revolutionary Army an Spanish Forces sa Battle of Alapan sa Imus Cavite kan 1898.
Segun ki Agbayani, nakikisumaro sa okasyon an manlain lain na mga ahensya de gobierno asin magin an mga pribadong sektor.
Ikinaugma man kaini na nahihiling suboot sa presenteng panahon an pag-appreciate kan publiko sa National Flag day sa paagi kan pagdi-display kan bandera sa saindang mga behikulo, harong asin mga establishimento.
Paliwanag kaini na maski pa an mga ordinaryong namamanwaan an nagpapahiling na man nin importansya sa pagrespeto kan bandera kan nacion.
Katakod kaini, ipinagirumdom man ni Agbayani na an sarong persona na magbabastos sa bandera kan nacion an igwang mga paninimbagan sa irarom kan Republic Act 8491 o Flag and Heraldic Code of the Philippines.
