LEGAZPI CITY – Ipigduon kan Bise alkalde kan banwaan kan Manito, Albay na igwang permit to operate an bulangan na ipigrereklamo kan sarong residente.
Sa intrevista kan Bombo Radyo Legazpi ki Vice Mayor Carlito Belludo, pighayag kaini na inaprubaran kan mga konsehal sa banwaan an nasambitan na bulangan antes ini natawanan nin permit.
Sa ibong na lado, klinaro kan opisyal na bako na nakapangaran saiya an bulangan huli ta dae na pigtutugutan an mga public servant na mag-operate kan siring na mga bagay alagad inako kaini na dati ining nasa pangaran niya alagad ibang tawo na suboot an nagpapadalagan kaini ngunyan.
Inako man ni Belludo na bako na marhay magayon an istruktura kaini huli ta nadanyaran kan mga nakalihis na bagyo alagad padiit-diit na suboot ining pigpapakarahay huli ta dae man kakayanon na sararuan sana ining ipatrabaho.
Marurumduman na nag-ugat an isyu sa reklamo kan sarong parabulang katakod kan suboot na pagkakaigwa nin iligal na mga pasugal sa laog kaini asin bako magayon na istruktura kun sain trapal sana an lanob kaini.
