LEGAZPI CITY — Maduon na pinahimutikan kan pamayuhan kan Manito Municipal Police Station an alegasyon sainda na igwa nin nangyayaring cover up sa suboot bulangan na pagsadiri kan bise alkalde kan banwaan.
Sa intrevista kan Bombo Radyo Legazpi ki PSI Abraham Buendia, sinabi kaini dae nin katotoohan an nasambitan na alegasyon asin posibleng igwa sanang mga tawo na mawot na magpaabot nin mga negstibong isyu.
Segun sa opisyal, sa saindang pagbisita sa nasambitan na bulangan, wara man sindang nahiling na ano man na iligal na aktibidad kontraryo sa pigtataram kan naga-reklamo digdi.
Nag-ugat an isyu sa reklamo kan sarong residente sa lugar na igwa nin nagpapakawat nin dice apwera pa sa pagpapabulang asin an bako angay na lugar.
Tinawan duon man ni Buendia na kumpleto an permit kan cockpit alagad ibeberipika man giraray an impormasyon ngani na masiertong warang ano man na pigbabalgar an tagsadiri kaini.
