Pig-implementar kan gobyerno probinsyal kan Quezon an mandatoryong pagsulot nin face mask sa gabos na indoor asin outdoor settings kun sain dae pig-iimplementar an physical distancing susog sa Executive Order No. DHT-60.
Ini an sa tahaw kan paglangkaw kan kaso nin mga helang arog kan sipon, abo, influenza-like illnesses severe respiratory infections arog kan community acquired pneumonia, base sa ipinaluwas na abiso ni Quezon Governor Helen Tan, na saro man na doktor.
Segun sa provincial government, dapat tulos na mag-self-isolate an sisay man na igwang sintomas arog kan sipon, sore throat, o kalintura, sa ibong kan nagtetenir na optional an testing.
Pig-enganyar man an publiko na magpabakuna laban sa flu at pneumococcal diseases, asin padagos na magmantenir nin tamang kalinigan asin pagsunod sa minimum health standards.
Mientrastanto, ipig-anunsyar kan Lucena City Public Information Office na suspendido liwat an face-to-face classes sa gabos na lebel, pampubliko man o pribado, poon ngonian na Lunes, Oktubre 20 hasta Miyerkules, Oktubre 22, bilang paglikay sa paglakop kan flu asin pulmonya.
