LEGAZPI CITY- (Update) Pig-iimbestigaran na ngonian kan mga otoridad an motibo sa nangyaring pambabadil sa manager kan sarong motorcycle branch sa Brgy. Cabangan, ciudad kan Legazpi.
Bandang alas-ocho kasubagong aga kan badilon sa laog mismo kan nasabing branch si Emerson Villaraza, 30-anyos na residente ng Brgy. Puro.
Sa ekslusibong intrevista kan Bombo Radyo Legazpi sa saro sa mga empleyado na si alyas ‘Joey’, napag-aram na naglilimpia sa area si Villaraza kan maglaog an lalaki asin nagpabistong customer.
Paramientras na nagluwas an nasabing empleyado tangarig na magkaag nin mga tarpaulin asin magpreparar sa pagbubukas kan outlet alagad antes ini, nadangog pa ni Joey na naghapot an lalaki para sa sarong yunit nin motorsiklo.
Makalihis pa an nagkapirang oras, nadangog na sana kan mga ini an putok kan badil alagad huli sa takot, nagtago muna sa banyo kan establisyemento kun saen nadangog an saro pang pagputok.
Kan magkusog-boot na magluwas an mg ini, nakabulagta na sa salog an manager asin dae na naghahangos.
Mareskas man na nagdalagan sa walang parte kan edificio an suspek pasiring sa naghahalat na duwa pang kaibanan na lunad kan motorsiklo.
Nagluluwas sa inisyal na imbestigasyon na kan mga otoridad na tama sa sentido an rason kan kagadanan kaini mientras na narekober man sa pinangyarihan kan insidente an duwang basyo nin bala para sa kalibre 45 na badil.
