Warang plano an Malacañang na sunadan nin kaso si dating Congressman Zaldy Co sa ibong kan mga akusasyon kaini sa iniluwas na duwang video kun saen ipigdawit si Presidente Ferdinand Marcos Jr. sa suboot P100 billion insertion sa 2025 national budget.
Segun ki Palace Press Officer Atty. Claire Castro, wara siyang nadadangog na siring na pag-oolay sa Palasyo huli sa dae man nahilingan nin pagkahandal an Presidente makalihis magtaram asin mag-akusar si Co sa paagi kan saiyang video message.
Dae suboot nahihiling kan opisyal na papansinon kan Presidente an mga pigtataram ni Co asin bahala na suboot an Ombudsman na mag-imbestigar sa mga ibinuyagyag kaini.
Sinabi ni Castro na bahala na an Ombudsman na magsunad nin kaso ki Co kun may dapat ikaso saiya, pero an pinakamainam suboot na magigibo ni Co an mag-uli sa Pilipinas asin patunayan an gabos nin mga akusasyon laban sa Presidente.
Para sa Palasyo, warang kuwenta asin basura suboot an mga akusasyon ni Co orog na kun dae man kaini mapatunayan asin sagkod taram sana siya.
