Pinahimutikan kan Malacañang an mga akusasyon kan nagkapirang kongresista na aram ni Presidente Ferdinand Marcos, Jr. an “kickbacks” na naresibe kan nagkapirang halangkaw na opisyal gikan sa flood control projects.
Segun kay Palace Press Officer Usec. Claire Castro na nagibo na kan Kamara an mandato kaini na imbestigaran an pagkaimbwelto kan presidente sa flood control scandal, na nag-agi sa proseso asin nadeterminaran na warang basehan.
Segun ki Castro, dae dapat gamiton na armas an anuman na warang basehan na panraraot ngani sanang paluyahon an tiwala kan mga tawo sa gobyerno.
An Palasyo, sa ibong na lado, nagdistansya kan hapoton kun dapat na magtaram an opisyal na konektado sa isyu.
Nagsayuma man si Castro na pahimutikan an akusasyon huli ta maski sinda dae pa nahihiling an suboot text message sa pagultanan kan presidente asin ni dating Usec. Adrian Bersamin, na suboot “bagman” kan presidente.
Pigduon kan Malacañang an kamawotan kan presidente na magtutok muna sa pagbuwat kan ekonomiya kan nasyon, asin pabayaan an ibang ahensya na mag-imbestigar kan anuman na impormasyon na may kinaaraman sa flood control scandal.
