LEGAZPI CITY – Na-eksperyensyahan kan mga residentes kan Barangay Muladbucad Grande, Guinobatan, Albay an mala-asupreng parong asin ashfall huli sa padagos na pag-aalburuto kan Bulkang Mayon.
Segun ki Punong Barangay Henry Racadag sa intrevista kan Bombo Radyo Legazpi na pwedesir na suminabay an pagbagsak nin abo sa raot nin panahon sa saindang lugar kun kaya dae ninda ini narisa kan enot.
Nanotaran man suboot an mala-asupreng parong sa ibang parte kan saindang barangay na kataid sana kan 6KM permanent danger zone kan Bulkan kun kaya inabisuhan na ninda an saindang mga residentes na mag-ebakwar na para sa saindang kaligtasan.
Punto niya na an namatean na mala-asupreng parong asin ashfall an labing delikado sa salud kan mga omboy, may edad na, maluluya an resistensya, asin may mga helang.
Pagsyerto man kan opisyal na padagos man an saindang koordinasyon sa Lokal na Gobierno nganing matabangan an saiyang nasasakupan na naapektaran kan aktibidaded kan Bulkan Mayon.
Paliwanag man ni Racadag na dae niya man mapugulan an saindang mga paraooma na dae maglaog sa 6KM permanent danger zone huli ta kaipuhan nindang bisitahon an saindang omahan asin atamang hayop.
