LEGAZPI CITY-Nagsangat ngonian na aldaw an Makabayan bloc nini ‘Motion for Reconsideration’ sa Korte Suprema mapadapit sa nagin desisyon kaini sa Impeachment.
Kung sain, inatendiran kan mismong mga kinatawan kan Makabayan party-list kairiba an nagkapirang lider kan mga progresibong grupo sa pagsusumiter kan mosyon.
Isinangat kan grupo an consolidated motion for reconsideration and intervention ngani na magapela sa Korte Suprema.
Obheto kan mosyon na baguhon o baliktadon kan Kataastaasang Hukuman an deklarasyon sa ‘articles of impeachment’ na ipinasa kan Kamara sa Senado.
Piglalaom man kan mosyon na pakusogon o paburan kan Korte Suprema na ‘valid’ an nagin ‘transmittal’ kan Articles of Impeachment sa Senado ngani mapuunan na an paglilitis.
Nagtutubod man an grupo na warang ginibong ‘grave abuse of discretion’ an House of Representatives sa pagpopoon kan impeachment complaint.
Sinabi man na warang nagin pagbayolar sa ‘1 year ban rule’ na siyang saro sa mga nagin basehan ngani mapawarang bisa kan Korte Suprema an Articles of Impeachment.
Kairiba sa mga intervenors sa pigsangat na mosyon sinda former ACT Teachers party-list Rep. France Castro, Gabriela Women’s Party Rep. Arlene Brosas asin Kabataan party-list Rep. Raoul Manuel na siyang nag-endorso sa ikaduwang impeachment complaint.
