LEGAZPI CITY- Inagyat kan Makabayan Bloc si Health Secretary Francisco Duque III na magbaba na sa pwesto makalihis an nadiskobre kan Commission on Audit na P67 bilyon na dae nagamit o kwestiyobleng pondo kan Department of Health.
Sa eksklusibong intrevista kan Bombo Radyo Legazpi kay Bayan Muna Rep. Carlos Isagani Zarate, tinyaw kaini an kapalpakan asin kapabayaan kan opisyal asin maging kan administrasyon sa paggamit kan pondo na importante ngunyan na may pandemya.
Sa nasabing kantidad, P24 bilyon an unobligated o dae nahiro asin nagamit mantang igwa pa nin nasa P48 bilyon na kwestiyoble an pinanggamitan asin an mga dokumentos na pigpresentar.
Segun kay Zarate, makamundo an siring na bareta lalo pang dakol na kuta na mga Filipinong nagtitios ngunyan na may pandemya an natabangan kan pondo lalo na an mga tinamaan kan helang asin nagpaparahay pa sa ospital.
Agyat kan Kongresista na kung may delikadesa pa si Duque mas maray pang magbaba na ini sa pwesto ngani na maribay nin mas maray asin mas may kapabilidad na opisyal.
Nangapudan man ni Zarate na maimbestigaran an mga kwestiyonableng pondo huli ta maski na bako pa siertong napasiring sa korapsyon malinaw na nagkaigwa nin criminal negligence sa pagpalyar sa paggamit kaini.
