Nagsunad si House Majority Leader Ferdinand Alexander Marcos nin propuestong ley na magtatao nin libreng kuryente sa mga pamilyang hibaba an konsumo.
Sa irarom kan House Bill No. 2700 o “Free Electricity for Low-Consumption Households Act,” sasaluhon kan gobierno an bilog na babayadan sa kuryente kan mga kwalipikadong namamanwaan.
Dae man papatawa nin 12% VAT an itataong subsidiya.
Sakop kan propuesyo an mga harong na nagagamit nin dae malagpas sa 135 kilowatt-hours (kWh) kada bulan o may pigbabayadan na dae malagpas sa P2,000 o mas hibaba pa digdi.
Kaipuhan sana ining mapatunayan kan Energy Regulatory Commission asin Department of Energy.
Obheto kan propuesto na ribayan an presenteng sistema kan lifeline rate kun sain ibang consumers an nagsisimbag sa subsidiya kan mga nagtitios.
Sa bagong sistema, direkta nang maghahali sa gobierno an pondo ngani na mas magin patas asin malinaw an pagtatao nin tabang.
Mapaluwas man nin zero-charge bill an mga distribution utility sa mga kwalipikadong benepisyaryo asin magpapasumiter nin reimbursement sa DOE, na isasairarom sa audit kan Commission on Audit.
